Miami pode ser unha porta de entrada a Estados Unidos, pero tamén aos países de Latinoamérica. De aí o interese da Asociación de Colleteiros Embotelladores do Ribeiro por achegarse a este mercado. Un primeiro paso neste senso dábao o seu presidente, Brais Iglesias, que aproveitaba a súa estadía nesta cidade no marco da feira Savbor Food & Wine (23 e 24 de xuño) para establecer contacto co seu alcalde, Tomás Pedro Regalado.
Ademais, Iglesias participaba nun xantar de negocios cun dos directivos da Asociación de Empresarios e Profesionais Galegos de Estados Unidos (AEGUSA), Juan José Casais. Esta entidade está formada por profesionais e empresarios de todos os sectores e entre os seus asociados (un total de 266 só en Miami) hai importadores e distribuidores de viño. Neste encontro, celebrado en Casa Juancho, destacábase “a necesidade de ampliar as colaboracións entre os empresarios galegos no exterior e as empresas galegas que buscan exportar, recordando ese espíritu emigrante galego de axudarse uns a outros”, segundo se informa dende a Asociación de Colleiteiros Embotelladores do Ribeiro.
Ademais Casais e Lorenzo concidían en que o mercado norteamericano ofrece interesantes oportunidades para os viños destes produtores do Ribeiro xa que nel consúmese máis branco que tinto e están buscando novos produtos, polo que as elaboracións de colleiteiro “poden sorprender por ser viños de autor con personalidade propia”.
A partir deste contacto xurdían varias propostas “moi interesantes para ambas asociacións”. Así AEGUSA vén de ofrecerlle, de xeito gratuíto, á asociación do Ribeiro un stand para que “os asistentes ao II Encontro de Empresarios Galegos do Mundo podan degustar viños de colleiteiro”. Este foro terá lugar o vindeiro 5 de agosto no Hotel Los Abetos en Santiago de Compostela.
Ademais acordouse estudar a posibilidade de que AEGUSA organice o vindeiro ano un evento público para promocionar e impulsar a comercialización de viños de colleiteiro.
Fotos: cedidas pola Asociación de Colleiteiros Embotelladores do Ribeiro.