A Asociación de Familiares de Enfermos e Alzheimer e outras demencias de Ourense (Afaor) vén de recibir unha axuda económica de 12.000 euros por parte de DKV Seguros. Así se puxo de manifesto esta mañá tras a firma dun convenio entre ambas entidades, un acto que levaron a cabo a presidenta de Afaor, María de los Ángeles Blanco, e a directora da sucursal de DKV Seguros en Ourense, Begoña Díaz.
A axuda enmárcase dentro dunha convocatoria pública promovida por DKV Seguros que elixe a aqueles proxectos sociais e medioambientais máis destacados e nos que Afaor resultou ser un dos seleccionados. “É unha asociación que ten un equipo e este é un recoñecemento ao voso traballo”, expuxo Díaz, tras a entrega do talón á representante de Afaor. Lembrou tamén que esta é a terceira vez que a empresa colabora coa asociación.
Pola súa banda, Blanco agradeceu a DKV a súa axuda que, segundo dixo, “fai posible que os nosos programas atendan a máis de 70 persoas cada día”. O proxecto de Afaor foi un dos nove elixidos, dun total de 103 de toda España.