O alcalde do Barco de Valdeorras, Alfredo García, en calidade de presidente da Federación Galega de Municipios e Provincias (Fegamp), asinou esta mañá, 3 de maio, un convenio coa Xunta co obxectivo de impulsar a adhesión dos concellos ao programa de vivendas baleiras. A través da conselleira de Infraestruturas e Vivenda, Ethel Vázquez, administración e federación fixeron un chamamento para que as corporacións locais aposten por destinar este tipo de casas a alugueres sociais.
Segundo se explicou dende o goberno autonómico, estas vivendas adxudicaranse a persoas vulnerables de xeito compatible con outras axudas públicas. Para acadar isto, os municipios interesados deben dirixirse á Xunta para solicitar a súa adhesión ao programa e mobilizar vivendas baleiras que estarán dobremente aseguradas para axudar a persoas en risco.