Os profesionais sanitarios da comarca lucense de Quiroga (Folgoso de Caurel, Quiroga e Ribas de Sil) foron os protagonistas do recoñecemento que a Asociación de Médicos de Galicia (Asomega) ofreceu en Quiroga. Un acto presidido polo presidente do Parlamento de Galicia, Miguel Ángel Santalices, e polo conselleiro de Sanidade da Xunta, Jesús Vázquez Almuiña que tiña tiña lugar na mañá do 4 de agosto no marco do tradicional xantar que Asomega celebra cada verán, e que contou coa asistencia de máis de cen persoas entre profesionais sanitarios e familiares.
Na inauguración, o presidente de Asomega, o trivés Julio Ancochea, agradeceu o labor dos seus antecesores no cargo comprometéndose a “seguir con paixón a súa tarefa”, recalcando os valores humanos “como eixe da actividade do profesional sanitario”. Tamén eloxiou a figura do médico rural como “exemplo da necesaria humanización da medicina”. O presidente do Parlamento pola sua banda, resaltou o importante labor que Asomega vén desempeñando desde os seus inicios “por manter forte e vivo o vínculo do profesional sanitario que traballa fóra de Galicia, coa súa terra natal”. E xa a clausura, o conselleiro Vázquez Almuiña agradeceu a Asomega “a celebración deste recoñecemento”, resaltando que “son os profesionais sanitarios como os homenaxeados en Quiroga, os que están facendo posible unha das liñas estratéxicas da Conselleria: a coordinación da atención primaria e a especializada, especialmente intensa e importante no ámbito rural”.
O momento máis entrañable do acto era a intervención de Inmaculada Ramos, vicepresidenta de Asomega, que rendía tributo aos profesionais sanitarios da comarca que exerceron durante a súa infancia, entre os anos 1971 e 1981, destacando “a importancia do seu labor para manter o benestar e a saúde dos veciños de Quiroga”.
Junto ao alcalde de Quiroga, Julio Álvarez, asistiron ao recoñecemento personalidades relevantes do sector sanitario como Miguel Carrero, presidente de Previsión Sanitaria Nacional; os presidentes dos colexios de Médicos de Lugo e A Coruña, Manuel Boquete e Luciano Vidán, respectivamente, deputados do Parlamento de Galicia como Julia Rodríguez, senadores nacionais como Dámaso López e Carmen Leyte e o expresidente da Organización Médica Colegial, Juan José Rodríguez Sendín.
O acto, celebrado no Auditorio de Quiroga, remataba coa entrega de diplomas a familiares de desaparecidos e a homenaxeados presentes e coa tradicional foto de familia. O xantar tiña lugar no Restaurante Day Dos.
Fotos cedidas.