No decurso dunha viaxe que realizaban por distintas zonas vinícolas de España e Portugal, membros da Asociación Italiana de Produtores de Viño Naturais ViniVeri achegábanse ata a comarca de Valdeorras. En concreto visitaban a finais de novembro a adega La Perdida, situada no concello de Larouco.
O grupo estaba formado por 17 viticultores e interesábanse pola “forma de traballar o viñedo, sempre en ausencia de produtos químicos. Tamén me preguntaban sobre a elaboración de viños en cubetas de barro, técnica na que esta adega foi pioneira na súa utilización en Galicia”, tal e como sinala Ignacio González, responsable da adega La Perdida.
Nestes momentos a Asociacion ViniVeri é a agrupación máis forte de produtores de viños naturais en Italia. Anualmente organiza unha feira de viños naturais nas proximidades de Venecia, a cuxa próxima edición ten sido convidada a adega La Perdida. Celebrarase no mes de marzo.
Tras pasar por Valdeorras, este grupo de viticultores italianos desprazábase ata o concello de Manzaneda para coñecer a experiencia de Laura Lorenzo, de Daterra Viticultores, unha moza viticultora que segue tamén técnicas naturais de traballo no viñedo.
Fotos cedidas pola adega La Perdida.
