Entre brindes de viño novo, moita música e deliciosos petiscos desenvólvese cada outono a Festa da Vendima en Punxeiro (Viana do Bolo). O sábado 14 de outubro esta celebración cumprirá once edicións, cun programa moi semellante ao de anos anos anteriores. A partires da sete da tarde veciños e visitantes congregaranse na praza do pobo para escoitar o pregón que marcará o inicio da festa. Antes poderán mercar a súa cunca, acompañada dun pano de cor, nun punto de venda que se instalará na entrada de Punxeiro. O prezo será de 13 euros, se ben tamén se poderá adquirir de forma anticipada por 11 euros na Ferretería Bibei e no Super Trisquel de Viana.
Tras o pregón será o son das charangas o que marque o inicio do percorrido. Serán un total de tres: Fuego, Achicoria e Tomalleoutra. Empezarán a tocar e dirixiranse a outras tantas adegas que abrirán as súas portas para recibir aos participantes. Nelas poderase degustar viño tinto e branco, así como un amplo abano de saborosos pinchos caseiros. Haberaos quentes, fríos e mesmo algún doce. Ao pechar estas tres, abrirán as seguintes.
En torno ás once da noite completarase o circuíto polas adegas e os participantes trasladaranse ata o campo de festa para continuar a celebración ao ritmo da música do grupo América de Vigo e da orquestra Os Players. Tampouco faltará a tradicional tirada de fogos de cores.
Esta XI Festa da Vendima será organizada pola Comisión de Festas de Punxeiro en colaboración co Centro de Animación deste pobo.