O Consello da Xunta aproba o proxecto de reforma da Lei de Saúde de Galicia

Este texto contempla a desaparición da área sanitaria de Valdeorras, que pasa a converterse en distrito, e a creación dunha área única para a provincia de Ourense

O pesidente da Xunta, Alberto Núñez Feijóo, co conselleiro de Sanidade, na rolda de prensa posterior ao Consello da Xunta.

Na reunión do Consello da Xunta celebrada na mañá do 7 de decembro vén de aprobarse o proxecto de lei polo que se modifica a Lei 8/2008, do 10 de xullo, de saúde de Galicia. Esta reforma lexislativa reformula 14 artigos e incorpora tres artigos novos, “cos cales se adapta a normativa ás novas realidades e inclúe aspectos máis especificamente axeitados ao marco normativo actual (estatal, básico e autonómico)”, segundo a Xunta.

A reforma aborda a organización territorial da sanidade galega, que, no caso da provincia de Ourense, supón a desaparición da área sanitaria de Valdeorras, que pasa a converterse en distrito, quedando unha única área saniaria: a da provincia de Ourense. En total a nivel galego crearanse 14 distritos sanitarios ligados “á institución hospitalaria existente no seu ámbito territorial, mantendo a agrupación de concellos que se realiza nos decretos de creación das EOXI”, segundo a Xunta. Tamén se indica que a nova “organización territorial pretende acadar unha “utilización óptima dos recursos dispoñibles, tanto materiais como humanos, dentro do ámbito territorial da área sanitaria, con maior coordinación entre primaria e hospitalaria; ao mesmo tempo que favorece que a poboación galega dispoña en todo momento dunha organización sanitaria máis eficiente”.

 

Entrada principal do Hospital Comarcal de Valdeorras, no Barco.

O presidente da Xunta de Galicia, Alberto Núñez, aseguraba tras a reunión do Consello que “a aprobación da reforma da Lei de saúde blinda a existencia dos hospitais comarcais coa creación de 14 distritos sanitarios, de tal xeito que ningún goberno poderá diminuír ou eliminar un hospital comarcal en Galicia se non é por lei e por autorización parlamentaria”.

Esta modificación lexislativa tamén aborda a participación social no ámbito sanitario, a consideración de autoridade sanitaria, a mobilidade e itinenarios profesionais, e o establecemento de principios básicos para regulación da docencia, investigación e innovación. Para o conselleiro de Sanidade, Jesús Vázquez Almuiña, “o paciente é o gran beneficiado desta reforma de lei”, xa que haberá máis e mellores servizos nos hospitais comarcais e servizos que serán cada vez máis próximos á poboación.

Dende os grupos da oposición vense de amosar o seu rexeitamento frontal a esta reforma. Así o portavoz de Sanidade do grupo socialista, Julio Torrado, acusaba hoxe ao presidente da Xunta de ter “consumado un ataque deliberado contra os hospitais das áreas sanitarias eliminadas e os pacientes que son atendidos neles”. Así o dixo logo de coñecer a aprobación “en plena ponte da Constitución, da reforma da Lei de Saúde que consolida a integración de Burela, Salnés, Monforte e Valdeorras nas áreas das grandes cidades”.

Torrado aseguraba tamén que co “anuncio da creación de 14 distritos, o que queren agochar é que non van dar un paso atrás na súa folla de ruta para sabotear a sanidade pública” e criticaba que “nin sequera teñan a valentía de admitir que tódolos hospitais incluídos nos pretendidos distritos, en realidade son absorbidos polas áreas sanitarias”.

Pola súa banda, a portavoz nacional do BNG, Ana Pontón, aludía ao “novo recorte nos servizos sanitarios galegos que se esconde detrás da reforma aprobada hoxe no Consello da Xunta”. Pontón aseguraba que que o PP terá “enfronte ao BNG ante este novo recorte que suprime catro áreas sanitarias e rebaixará as prestacións sanitarias nos hospitais comarcais”.

Dende o grupo parlamentario de En Marea, o seu portavoz, Luis Villares, crtica a aprobación da reforma da Lei de Saúde “aproveitando a véspera dun festivo e no medio dunha longa ponte coa que, unha vez máis, o Goberno galego pretende que pase desapercibido”. Ademais considera esta reforma como “o novo desmantelamento da atención primaria por parte do Goberno galego”. E resalta a “gravidade da desaparición das áreas sanitarias e que padecen xa os efectos da chamada xestión integrada, con falla de profesionais, lista de agarda, derivacións a Lugo, no caso da Mariña e Monforte, ou a Ourense no Barco, ademais das derivacións a hospitais privados”.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies