A Deputación de Ourense anuncia a convocatoria da XIV edición do Premio “Pura e Dora Vázquez” de narración e ilustración infantil e xuvenil, dotado de 3.000 euros para as dúas modalidades. O obxectivo da iniciativa é recoñecer a calidade literaria e artística de nenos e mozos á par que se fomenta a lectura entre este público e se da a coñecer as figuras das escritoras que dan nome ao certame.
Os requisitos para participar no concurso pasan por escribir as obras en lingua galega, teñen que ser “inéditas e totalmente orixinais” e deberán ter unha extensión mínima de 25 páxinas e un máximo de 100. En canto ao formato, deberá ser A4, fonte Times New Roman, tamaño de letra 12 e interliñado 1,5. A temática é libre aínda que se limita a temas aptos para público infantil ou xuvenil. O prazo para presentar os textos remata o 30 de decembro.
