Davide Rodríguez pedirá no Parlamento unha nova liña de axudas para medidas preventivas fronte ataques da fauna salvaxe

Vén de presentar unha proposición non de lei, xunto a tamén deputada de En Marea Paula Quinteiro, para o seu debate no pleno da Cámara galega

O deputado de En Marea, Davide Rodríguez de Manzaneda, intervindo nun pleno no Parlamento galego.

O pasado 30 de novembro comezaban a recibirse as resolucións de axuda para a implantación de medidas preventivas fronte aos ataques de lobo e xabaril. “Todas elas teñen un prazo de xustificación que remata o 11 de decembro. A resolución deixa, no mellor dos casos, 10 días naturais para facer os trámites necesarios (sempre e cando se recibira a carta certificada onte e non o luns que vén). Na práctica, con dúas fins de semana e dous festivos nacionais polo medio, os gandeiros/as dispoñen de 6 días para poder mercar, pagar, identificar, certificar os investimentos e xustificar a axuda, como por exemplo, un cachorro de mastín. A todo isto hai que engadirlle que este ano, por mor dos incendios forestais, moita fauna salvaxe está a cercar as explotacións ao faltarlle o alimento”, aseguran dende En Marea os deputados autonómicos Davide Rodríguez e Paula Quinteiro.

Aseguran que esta situación “non é unha novidade para a Xunta de Galicia, xa que o ano pasado aconteceu exactamente o mesmo”, e ante isto, veñen de presentar unha proposición non de lei relativa á resolución de axuda para a implantación de medidas preventivas fronte aos ataques do lobo e xabaril para o seu debate no pleno do Parlamento galego.

Nela instan á Xunta de Galicia, por unha banda, a “sacar unha nova liña de subvencións onde se recollan os seguintes puntos: publicar as axudas a comezo de ano e permitir a solicitude das mesmas durante varios meses para non condicionar a realización dos investimentos por parte do peticionario (en especial para a adquisición de cans mastíns), engadir outros investimentos que agora non están contemplados e que son imprescindibles para a protección do gando como son os peches fixos con malla ovelleira e arames electrificados, así como a inclusión dos custes de mantemento dos mastíns e excluír dos investimentos asignados a cans de garda e protección, as razas de pastoreo ou “careo” como son o Carea Leonés ou o Can de Palleiro. Consideramos que estas son razas de pastoreo que serven para guiar o gando e non para protexelo”.

En segundo lugar, nesta proposición non de lei instan á Administración galega a “reunirse co sector agrogandeiro e cos grupos e entidades que promulgan a convivencia entre a actividade humana no rural e a fauna salvaxe para tratar de adaptar o marco lexislativo actual en materia de convivencia coa fauna salvaxe á situación real do territorio, en especial sobre a problemática do lobo”.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies