O xurado do Concurso de Carteis da 54ª Feira do Viño do Ribeiro reuníase na tarde 9 de marzo, na sede do Consello Regulador do Ribeiro, en Ribadavia, co obxectivo de escoller o cartel que representará a Feira do Viño do Ribeiro 2017, que terá lugar na vila ribadaviense do 29 de abril ao 1 de maio.
Entre as 188 propostas presentadas ao certame resultaba ganadora a da profesional Agustina Jouandon, orixinaria de Arxentina e actualmente afincada en Santiago de Compostela. É deseñadora gráfica e ilustradora con máis de 7 anos de experiencia.
Para a elección desta imaxe promocional, o Concurso de Carteis da 54ª Feira do Viño do Ribeiro contaba cun xurado multidisciplinar integrado por profesionais no ámbito das artes, comunicación e deseño gráfico. Ao longo da xornada de deliberación das preto de 200 obras participantes foron sometidas ao xuízo destes profesionais, resultando a obra gañadora premiada con 1.500€.
O xurado estaba formado polas seguintes persoas: a xerente do C.R.D.O. Ribeiro, Cristina Alcalá; a concelleira de Cultura do Concello de Ribadavia, María Touza; o director do Centro Cultural “Marcos Valcárcel” de Ourense, Francisco González Bouzán; o profesor no grao de Publicidade e Relacións Públicas da Uvigo, Xosé Rúas; o creativo de La10@planta e coordinador da OurenseIccWeek, Manuel Araújo; o director creativo da axencia Incubarte Creatividad Multicanal, Jaime Díaz; a xornalista de Faro de Vigo, Adela Ferradás; o fotógrafo de La Voz de Galicia, Santi M. Amil; e o xefe de publicidade de La Región, Moncho Novoa.