De mans da directora xeral de Comercio, Sol Vázquez, e do xerente de Galicia Calidade, Alfonso Cabaleiro, recibía na mañá do 3 de maio a empresa Nor-Ibérica de Bebidas de Maside o certificado de uso da marca de garantía Galicia Calidade. Este selo, con validez para o próximos tres anos, permitirá a Nor-Ibérica de Bebidas incluír o distintivo nas etiquetaxes dos produtos certificados, así como nas diferentes accións para a súa promoción. En concreto, essta marca aparecerá nos augardentes brancos, de herbas, licor café e licor de herbas, comercializadas coas marcas Felipe Saavedra e Marqués de Marialva.
Nor-Ibérica de Bebidas poñíase en marcha no ano 2004 en Maside (Ourense), despois de contar con máis de 20 anos no sector vitivinícola, co obxectivo de elaborar augardentes e licores de gran calidade de forma totalmente artesanal.
Cun coidadoso proceso de selección das materias primas, os augardentes están elaborados partindo de bagazos controlados polo Consello Regulador das Indicacións Xeográficas das Augardentes e Licores Tradicionais de Galicia, o que permite comercializar un produto de máxima calidade e de recoñecemento internacional.
A directora xeral de Comercio, Sol Vázquez, eloxiaba a aposta desta empresa pola calidade e explicaba que a Consellería de Economía, Emprego e Industria ten en marcha a Estratexia de Reforzo de Galicia Calidade, un selo recoñecido e valorado polos consumidores que na actualidade suma xa máis de 300 produtos certificados e 79 empresas diferentes, cunha forte presenza do sector alimentario e da hostalería.
