Non é un tratado de ética, aínda que polo seu título puidera dar esa impresión. En “Ética del desorden. Pánico y sentido en el curso del siglo” non se opera “coa contraposición do bien ao mal, non busca un conxunto de prescricións para unha vida mellor nin unha idea do deber que guíe a acción”, asegura o seu autor, o ensaísta e filósofo galego Ignacio Castro Rey.
Este libro, que acaba de ver a luz a través da editorial Pre-Textos, aborda “momentos clave do pensamento contemporáneo”. E é o resultado de oito anos de traballo. A súa presentación está prevista para o vindeiro 8 de agosto ás sete da tarde na Feira do Libro da Coruña (Xardíns de Méndez Núñez). No acto intervirán, ademais do autor, Arturo Leyte e Manuel Vilariño.
Asemade, seis días antes, o 2 de agosto, Ignacio Castro asinará exemplares deste libro tamén na feira do libro coruñesa. Será na caseta da Librería Arenas de 18 a 21h.
