Hai poucas bibliotecas; o volume de fondos é relativamente pequeno na maior parte delas e os préstamos están en niveis medios baixos. Tampouco o gasto global da Administración nin o número de adquisicións presentan un panorama alentador na provincia.

Os datos no que atinxe a uso e disponibilidade de recursos bibliotecarios sitúan a Ourense no vagón de cola de Galicia e do Estado na meirande parte dos indicadores. Máis inalcanzables son aínda as medias europeas en ratios coma a transformación das bibliotecas tradicionais en multimedia, unha das últimas liñas de desenvolvemento recomendadas pola EU. En Ourense, os  recursos bibliográficos que hai son escasos e non están ben utilizados polos cidadáns.

A dispersión da poboación no rural é un factor que xoga en contra en Ourense. “A rede municipal non está ben desenvolvida”, sinala Elisa López, directora da Biblioteca Pública Nodal de Ourense, “e temos que atender a usuarios de concellos próximos á capital”.

De feito, as carencias na rede son as máis evidentes de toda a comunidade: só o 68% dos concellos da provincia contan cunha biblioteca (fronte ao 92% en Pontevedra ou o 87% na Coruña). E a porcentaxe de poboación que non dispón deste servizo en Ourense acada os 50.107 habitantes (o 15% do censo, cinco veces máis ca en Pontevedra ou na Coruña). Amais, o 60%das bibliotecas da provincia teñen menos de 100m2 e non pasan de ser puntos de servizo.

O fondo bibliográfico tamén é escaso. O 78% conta con menos de 2.000 volumes; o 21% consegue superar os 7.500 e só o 1% conta cun fondo por riba dos 20.000 libros. Ás 77 bibliotecas abertas na provincia, hai que engadir a existencia dende hai máis de 20 anos dun bibliobus que atende as necesidades daquelas áreas que non dispoñen de recursos bibliográficos propios.

Texto: R.R./Ourense       Foto: Eanes

(Máis información na edición en papel do periódico O Sil).