O parque transfronteirizo Xurés-Gerês podería ser declarado Reserva da Biosfera en abril. Así o anunciou o presidente da Xunta de Galicia, Emilio Pérez Touriño logo dunha xuntanza que mantivo co ministro de Ambiente, Ordenación do Territorio e Desenvolvemento Rexional de Portugal, Francisco Nunes Correira.
Touriño manifestou que “puxemos en valor este proxecto compartido para lograr a declaración, por parte da Unesco, da Reserva da Biosfera” de, indicou, “dous espazos senlleiros, protexidos, o do único parque nacional do lado portugués e o parque natural máis grande da parte de Galicia”.
De levarse adiante esta declaración, asegurou o presidente da Xunta, suporá “a primeira dun parque conxunto no espazo ibérico”. Pérez Touriño sinalou que as tramitacións están moi avanzadas e pola información da que dispoñen “temos idea de que antes do verán, en torno ó mes de abril, é probable que se produza a decisión da toma da candidatura”.
Texto: O Sil/Redacción Ourense Foto: Carlos G. Hervella
(Máis información na edición en papel do periódico O Sil).
