No Hospital Comarcal Valdeorras non existía a 31 de decembro de 2009 ningún paciente de “prioridade 1” (a máxima) esperando para ser intervido cirurxicamente. “Nese tipo de prioridade a lista de espera é cero, mentres que a nivel galego rebaixouse de 30 a 28 días. Polo tanto, os resultados no noso centro son excelentes”. Así o destacaba a xerente do Hospital Comarcal Valdeorras (HCV), María Jesús Magadán durante o balance do 2009 das listas de espera no centro realizado a finais de xaneiro.

Magadán sinalou asemade que no hospital do Barco leváronse a cabo un total de 2.030 intervencións cirúrxicas, fronte ás 2.158 do 2008. No que atinxe á listas de espera en consultas, o HCV atendeu un total de 61.970, das cales 16.511 foron de primeira consulta.

De cara ao 2010, a xerente adiantou que o centro valdeorrés terá como obxectivos “seguir aumentando o rendemento cirúrxico e a actividade en xornada ordinaria” e “desenvolver actividade extraordinaria segundo necesidades”.

No que respecta ao Hospital de Verín a súa directora xerente, Pilar Fraga, anunciou que o centro diminuíu o tempo de espera media para unha intervención cirúrxica en trece días, de 60 a 47 días. A xerente atribuíu este descenso “ao labor de xestión das listas levada a cabo polo servizo de Admisión e da dirección do hospital”. No centro os pacientes de prioridade 1 teñen unha espera media de 20 días.

Texto: O Sil/Redacción    Foto: Carlos G. Hervella

(Máis información na edición en papel do periódico O Sil).