Partimos dun documento de traballo conxunto e consensuado, no que tentamos priorizar demandas, algunhas das cales son históricas, outras xurdiron novas”. A voceira do Foro Valdeorras Século XXI, María Carmen Rodríguez, iniciaba así a rolda de prensa na que daba conta das conclusións da xuntanza desta entidade o 16 de abril no salón de plenos do Concello de Vilamartín.
Sobre a mesa, un variado conxunto de reivindicacións relativas a cuestións como as infraestruturas, o transporte, o patrimonio, ou a seguridade que se plasmaron, logo de dúas horas e media de reunión, nun documento conxunto e nunha serie de accións que porá en marcha a comisión de seguemento do Foro. Ademais, o anuncio de que a vindeira reunión terá como escenario Petín, dentro duns meses.
É o sexto encontro deste tipo que se desenvolve dende a creación deste marco de diálogo valdeorrés que reúne dende o 2007, por iniciativa da Asociación Empresarial Valdeorras (AEVA), e cada certo tempo a representantes empresariais, políticos e sindicais nun municipio diferente da comarca. Nesta ocasión participaron ou estiveron representados os concellos do Barco, A Rúa, Carballeda, Petín, Vilamartín, Larouco e A Veiga, así como a deputada autonómica María Carmen Acuña, o vicepresidente da Deputación de Ourense, Moisés Blanco; os sindicatos CIG e UGT, ademais de membros de AEVA e da Asociación Galega de Pizarristas (AGP). Desta volta incorporouse ao Foro o representante da Asociación de Hostelería e Turismo de Trevinca (Trevihost), Carlos López.
Un dos temas máis analizados ao longo do encontro foi o das infraestruturas, cunha mención especial á A-76, cuxa importancia para o desenvolvemento da zona puxeron de relevo todos os membros do Foro. E, neste senso, acordouse reactivar a Plataforma Pro-Autovía A-76 que integraba aos concellos de Monforte, O Barco e Ponferrada, así como aos axentes socioeconómicos destes municipios. O Foro proporá que a devandita plataforma reivindique a licitación do proxecto de execución da autovía antes de que remate o ano 2010.
Outra “preocupación latente da comarca é a reparación urxente do firme da estrada N-120 no treito de Valdeorras ao Bierzo”, salientaba a voceira do Foro, “tendo en conta ademais que só se trata de realizar traballos de mantemento”. Asimesmo, daráselle traslado ao Ministerio de Fomento da necesidade de que se “axilice a execución do proxecto da obra do enlace entre a estrada N-120 e a N-536”.
Texto: Ángeles Rodríguez Foto: Carlos G. Hervella
(Máis información na edición en papel do periódico O Sil).
