A falta de infraestruturas viarias segue sendo un dos talóns de Aquilés do oriente ourensán. Sorprende que a principal zona produtora e exportadora de lousa do mundo non dispoña dunhas infaestruturas viarias acordes cos tempos que corren, pero esa é a realidade.
Unha situación que se agravaba a finais do pasado ano 2012 co peche da N-120 (principal acceso á autovía A-6), debido a problemas no túnel da Barosa. Foron case tres meses nos que o tráfico se desviou por estradas como a N-536, que non reunía as condicións axeitadas para o tráfico pesado e que supoñía alargar ata máis dunha hora a viaxe e tamén tiña consecuencias económicas para sectores como o do transporte.
Tendo moi presente esa situación, e temendo que poda volver a repetirse, a mesa de seguemento da Plataforma da Autovía A-76 (da que forman parte os alcaldes de Ponferrada, O Barco e Monforte, ademais dos empresarios destas tres comarcas) vén de pedir ao Ministerio de Fomento que se aceleren os prazos para facer realidade esta vía e que o que inicio desta infraestrutura sexa nun punto moi concreto: entre os quilómetros 7 e 17,5 do estudo informativo da autovía, é dicir, no entorno do túnel da Barosa.
O obxectivo desta demanda, que acordaba na xuntanza celebrada pola mesa de segumento o 15 de xaneiro no Barco, é dobre. Por unha banda asegurar o inicio da autovía e, pola outra, evitar que se repita a problemática vivida a finais do 2012.
Este é o tema co que abrimos este número de febreiro do Periódico O Sil. Nel recollemos a valoración de administracións, políticos e empresarios sobre esta infraestrutura. Todos coinciden na súa relevancia para o futuro das tres comarcas polas que pasa (Bierzo, Valdeorras e Ourense).
Nesta edición falamos ademais dun dos recursos principais e diferenciadores da provincia, o termalismo. E facémolo coñecendo de primeira mans os proxectos nos que está traballando, neste caso a cidade de Ourense, para a súa posta en valor. Para iso conversamos co concelleiro de Termalismo ourensán, José Ángel Vázquez Barquero.
Tocamos asemade o turismo, pero dende o enfoque gastronómico, da man de Xantar, un salón gastronómico de carácter internacional que se desenvolverá a primeiros de marzo en Expourense. Antes haberá outras citas como é o caso das campañas dos namorados da provincia, con iniciativas como a Carreira O Barco Namora (que se celebrará nesta vila o 17 de febreiro), da XIII Mostra de Aceite de Quiroga (prevista para o 24 de febreiro), ou, por suposto, do Entroido.
A esta última celebración, que se vive de maneira intensa e especial na provincia de Ourense, adicámoslle dende o O Sil un amplo monográfico de máis de 50 páxinas que vimos de poñer nos quioscos conxuntamente con este número de febreiro.
