Malia ter as súas orixes en Tameirón (A Gudiña), é na pequena localidade de Outarelo (O Barco de Valdeorras) onde San Francisco Blanco, coñecido como o último mártir de Xapón, é venerado cada ano dende o século XVII, na capela onde se conservan a súa imaxe e reliquia (un cráneo).
O martes 5 de febreiro será cando a pequena localidade barquense se encha de devotos chegados dende diferentes pobos da zona, para asistir aos actos relixiosos na súa honra. Porén os fieis xa comezan a prepararse espiritualmente unha semana antes coa asistencia á misa, rosario e novena que se celebra dende o día 27 de xaneiro ata o día 4 de febreiro na capela de Outarelo a partires das 17 h.
E xa o día 5, poderán asistir a calquera das misas que se celebrarán cada hora dende as dez da mañá, especialmente pensadas para que todo aquel ao que lle sexa imposible asistir á misa maior, poida participar das celebracións eucarísticas na honra do mártir do Tameirón.
Texto: Mónica G. Hervella Foto: Carlos G. Hervella
