Unha vendima histórica. Ese é o balance que dende o Consello Regulador da Denominación de Orixe Monterrei se fai da colleita deste ano, na que se recolleron 2.057.874,4 quilos de uva, un 51,5% máis que na vendima do ano pasado.
A denominación comenzou pronto a recollida, o día 8 de setembro, e en pouco máis dun mes estaba rematada a vendima. Os últimos acios entraron nas adegas o 16 de outubro. As primeiras en ser recolectadas foron a Godello, a Dona Branca e a Albariño en brancas, e as Bastardo e Mencía en tintas. Estas ademais tiveron unha maduración da pel e das pepitas superior á do ano pasado.
O tempo foi bastante desigual nesta campaña e a brotación e o desenvolvemento da vide producíuse con adianto respecto ao 2008, como anuncian dende a Denominación. As precipitacións na desflora provocaron un mal cuallado dos acios que redundou nunha baixada da producción, principalmente na variedade Treixadura, unha das máis sensibles a estes cambios. Ademais, as choivas en forma de granizo que caíron en xullo provocaron danos puntuais nalgúns viñedos.
Pero estes problemas subsanáronse coas altas temperaturas da segunda quincena do mes de agosto e de setembro que permitiron que a calidade fitosatinara das uvas fora moi boa. Segundo se manifesta dende o Consello Regulador, estas condicións favoreceron a concentración de aromas e a acumulación de antocianos, (os que dan a cor nos tintos), que permite augurar unha colleita de alta calidade.
Texto: PGL/Ourense Foto: Carlos G. Hervella
(Máis información na edición en papel do Especial Viticultura 09 de O Sil).
