Aeva entregou os premios aos ganadores da Campaña de Nadal, nun acto no que se fixo un repaso polas actividades da asociación empresarial ao longo do pasado ano. Repartíronse 3.800 euros en premios, divididos nun talón de 500 euros, outro de 300 e 30 de 100 euros. O premio maior foi entregado por Estética Pamen, do Barco, e os 300 euros repartíunos Interópticas Versa.
Tamén se concederon os premios do décimo concurso de escaparates que AEVA realizou en colaboración coa Cámara de Comercio de Ourense. 16 establecementos participaron este ano no concurso, resultando ganador o comercio Azul e Rosa do Barco, que recibíu un diploma e 200 euros. Charo López e Perfumería Ana de La Puente, tamén do Barco, foron segundo e terceiro, respectivamente. O Sil entregou o cuarto premio, á Mercería Raquel de A Rúa. En total concedéronse oito galardóns.
Pola súa parte, o Centro Comercial Aberto O Barco entregou os premios aos ganadores do Concurso de Piropos, enmarcado dentro da Campaña de Namorados 2010. Premiáronse 24, 12 cunha cea en restaurantes asociados e outros 12 cun talón por valor de 25 euros para canxear por consumicións en catro bares do CCA.
Entre os ganadores puidéronse escoitar versos moi diversos destacando os localistas como “Nena, esas son curvas e non as da carretera de Santigoso” ou con referencias á vendima “Ogallá foras uva que che facía a vendima enteira”.
Texto: O Sil/Redacción Foto: Patricia González
(Máis información na edición en papel do periódico O Sil).
