Facendo honor ó seu nome os “troteiros”, máscaras do Entroido de Bande, visitarán, a modo de embaixadores do Entroido, os diferentes pobos deste concello ourensán. Este percorrido das máscaras iniciouse o primeiro domingo de febreiro e prolongarase, con diferentes saídas, ata o día 24 de febreiro, o martes de Entroido.
A próxima visita prevista será a do domingo día 15 de febreiro. Así será nesta xornada, a partires das doce do mediodía, cando os “troteiros” acheguen ata as aldeas de Vilameá, Buxán, As Maus, Vilela, Os Baños, Lebosandaus, Quintela, Santa Comba, As Forcadas, Mexide, O Pazo e Martiñán. Con este amplo percorrido quedará completado o traxecto realizado polas aldeas do municipio durante os dous domingos anteriores, estendendo así o alento tradicional do Entroido polos diferentes lugares do municipio. Así durante o 1 de febreiro os “troteiros” visitaron as aldeas de Sarreaus, A Igrexa, Ribas, Vilameá, Aldea de Arriba, Corvelle, Pereira, Seoane, Recarei, Cadós, Cima de Vila, A Granxa, Pazos, O Souto, Rubiás e Ponte Cadós.
No seguinte domingo, o pasado 8 de febreiro, o percorrido das máscaras seguiu polos lugares dos Sordos, O Viñal, Quintá, O Outeiro, Garabelos, San Fiz, As Campinas, Fervenza, Barrio, Quintela, Carpazás, Trarigo, Güín, A Ponte Liñares, Vilar e Lueda. Despois desa viaxe polas aldeas, durante o Domingo de Entroido, estas máscaras sairán en Bande tamén a partires das doce e media do mediodía. Xa pola tarde, está previsto un desfile de comparsas e disfraces, que se animará coa actuación de diversas charangas. Esta cita festiva está programada para as cinco e media da tarde.
A festa continuará o martes de Entroido cun programa de actos semellante. A mediodía os troteiros farán a súa última saída no Carnaval do 2004 e pola tarde desenvolverase un novo desfile. As comparsas con dez ou máis compoñentes recibirán 50 euros. Tamén durante o Entroido haberá polas tardes obradoiros de máscaras e capuchóns.
O Mércores de Cinza, ás sete e media tarde terá lugar o enterro da sardiña con capuchóns e viúvas, e coa actuación da Charanga de Bande. Despois queimada. Este será o colofón do Entroido de Bande deste ano.
Texto: A.R./Ourense Foto: Concello de Bande