O Museo Arqueolóxico Provincial de Ourense celebra o Día Internacional do Patrimonio Mundial

Haberá unha serie de actos ao redor da Semana do patrimonio moble coa actividade “Peza do ano”, para a que desta volta se escolleu a obra castresexa do “Sedente de Pedrafita”

 

“Sedente de Pedrafita”./ Foto: Museo Arqueolóxico Provincial de Ourense.

Sumándose á iniciativa da Sección de Patrimonio e Bens Culturais do Consello da Cultura Galega de celebrar o Día Internacional do Patrimonio Mundial (16 de novembro), o Museo Arqueolóxico Provincial de Ourense ten previsto realizar diversos actos ao redor da Semana do patrimonio moble, coa actividade “Peza do ano”.

A obra seleccionada polo museo como “Peza do ano” é o “Sedente de Pedrafita”. Esta entidade escolleuna porque entende que “nela conflúen os valores histórico-artísticos que a singularizan como unha das pezas máis excepcionais da plástica castrexa, ademais de ter ingresado nos fondos do Museo como doazón dun particular, o que pon de manifesto o interese e valoración dos cidadáns polo Patrimonio Cultural, ao comprender que os Museos son os lugares imprescindibles para a salvagarda da nosa memoria e para a transmisión do coñecemento científico”.

Así, dentro das actividades, o xoves día 16 ás 12:30h terá lugar unha visita guiada á peza na Sala de San Francisco: “Escolma de escultura”, na que se explicará “non só o valor histórico-artístico desta obra senón tamén o verdadeiro interese que adquiren as obras nos museos e o significado do Día Internacional do Patrimonio Mundial”, segundo adiantan dende o Museo Arqueolóxico Provincial de Ourense.

Máis información:
http://consellodacultura.gal/dia-do-patrimonio-2017.php
http://www.musarqourense.xunta.es/actividades/dia-internacional-do-patrimonio-mundial/

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies