Dinamizar a actividade cultural provincial é o obxectivo do festival Arteficial que terá lugar en Ribadavia o vindeiro sábado, 5 de setembro.
Esta novena edición de “Arteficial” trae consigo varias innovacións como é o escenario no que se van a desenvolver as actividades que estarán divididas en dous espazos: o interior da Capela da Madalena, onde se desenvolverán os concertos de música acústica, e o exterior da capela adaptado para a versión máis electrónica do festival.
Outra das novidades deste ano é que as actividades desenvolveranse en horario diurno, de 12:30 ás 22:30 horas, e as entradas para os asistentes serán gratuítas. O público terá a oportunidade de degustar os distintos pratos gastronómicos que os stands alí presentes ofertarán.
As actuacións musicais do evento correrán a cargo dos grupos Trilitrate, Músculo!, Diola, Avecrem, A Jigsaw, Cova, Ainara Legardon, Puma Pumku e a orquestra Pánico. Ademais dos concertos musicais, o festival conta na súa programación con actividades paralelas como o mercado das sementes ou a exposición de foto oficial que acolle unha mostra de fotografías de diferentes autores, todas elas referidas á temática social.
