Música, gastronomía e artesanía, na XXVIII Festa da Vendima de Leiro

Celebrarase o 27 de agosto e o seu programa presentábase esta mañá nun acto na Deputación de Ourense

Acto de presentación da Festa da Vendima de Leiro no Pazo Provincial.

Leiro acollerá o vindeiro 27 de agosto a XXVIII edición da “Festa da Vendima”, na que se mesturará a música, coa gastronomía e a artesanía. O programa deste certama facíase público na presentación celebrada esta mañá no Pazo Provincial. Nela participaban o vicepresidente da Deputación de Ourense, Rosendo Fernández; o alcalde e o concelleiro de Cultura de Leiro, Francisco José Fernández e Ramón Álvarez, respectivamente.

O programa de actividades comezará ás 10.00 horas coa recepción de acios a concurso e posterior exposición. Ás 11:30 horas será a benvida ás autoridades e convidados na Casa do Concello, para dar paso ás 12h á lectura do pregón na praza do Cruceiro, que nesta edición correrá a cargo da comisionada do Goberno fronte ao reto demográfico, Edelmira Barreira. O desfile de carrozas e charangas comezará ás 12:30h dende a rúa Gabino Bugallal ata o Campo da Feira e, ás 14h, será a visita ao XIV Mercado Artesanal (instalado no Salgueiral). O xantar popular comezará ás 14.30 horas.

A partir das 16:30h farase a entrega de premios aos gañadores dos concursos de Acios e Carrozas e continuarase con actividades infantís e festa no Salgueiral. O deporte terá o seu espazo tamén na celebración co partido de presentación do C.F. Leiro ás 17:45 horas. Por último, será a música a encargada de pechar esta celebración co concerto de corais da Vendima ás 20.00 horas e coa actuación en directo no Salgueiral ás 21.00 horas.

Un dos eventos máis atractivos da celebración é o desfile de carrozas que hai en modalidade infantil e adulta. “As carrozas deben facer referencia a motivos da vendima, da viña ou traballos da mesma e deben cumprir as características recollidas nas bases do certame, pois de non ser así, o xurado poderá descalificalos”, sinalaba o concelleiro de Cultura, quen lembrou os premios do certame sendo para os adultos de 1.000 euros para o primeiro premio, o segundo 750 euros e o terceiro premio 600 euros, e por participar no concurso reciben 300 euros de premio. E na modalidade infantil son de 400 euros para o primeiro, 300 euros para o segundo e 200 euros para o terceiro, e 50 euros por participar.

No relativo ao mercado artesanal, Ramón Álvarez dixo que levan 14 anos a celebralo e nesta edición “temos 25 artesáns confirmados procedentes principalmente da provincia de Ourense. Haberán artesáns de bixutería, esmaltes en frío, pedras, produtos alimentarios e viño”.

Rosendo Fernández destacaba que esta celebración “convértese nunha canle de promoción económica dun recurso endóxeno do Concello de Leiro”. Pola súa parte, o alcalde deste municipio ourensán lembraba a historia deste evento festivo e destacaba a “alta participación veciñal na celebración que contamos que, nesta edición, teña unha asistencia similar á de anos anteriores”.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies