A Valenzá, no Concello de Barbadás, acollerá este sábado 28 de maio a celebración da súa Noite Encantada, un evento organizado pola Asociación Galega de Empresas, Comercios e Autónomos (Agaeca) que permitirá prolongar o horario comercial dos establecementos da vila até as 23h, co obxectivo de dinamizar o consumo local. A presentación da programación tivo lugar onte, que correu a cargo do edil de Deportes, Adrián Varela, e a empresaria locai Annabel Lee, de Complementos Laiza, e o xerente da Librería Moraira.
Pero ademais da apertura do comercio, a Noite Encantada contempla tamén actividades lúdicas, deporte e ocio infantil. Deste xeito, haberá xincana infantil para nenos de 7 a 10 anos, que se desenvolverá entre as 17 e as 21h, haberá tamén unha gateada ou carreira para bebés de até 13 meses, que será ás 19.30h, e unha exhibición de zumba no parque da Liberade ás 17h.
As actividades deportivas compleméntanse cunha carreira popular que, na súa categoría absoluta, terá un percorrido de 7,5 quilómetros. O percorrido discorrerá pola vila e por outros lugares do mnicipio como As Lamas.
Na área comercial, a Noite Encantada contará coa participación dun total de 22 establecementos, de entre os adheridos á Agaeca. Eles tamén se integrarán na parte lúdico-infantil, pois ofrecerán nos seus escparates unha adiviña relacionada coa temática da xincana literaria infantil. Para participar no sorteo, terán que estar cubertas as 22 adiviñas.
O alcalde de Barbadás, Xosé Carlos Valcárcel, valorou esta iniciativa dos comerciantes que, segundo defniu, pretende “pór en valor o comercio de proximidade e actividades dirixidas a todas as idades”. Tamén indicou que a administración local participa nela coa posta a disposición da organización “tanto da infraestrutura como a campaña de publicidade”, sinalou.