A partires do vindeiro 21 de abril o Consello Regulador da Denominación de Orixe Monterrei organizará o “Curso de iniciación á cata de viños” co fin de achegar aos participantes nocións básicas sobre viticultura, enoloxía e mecanismos de cata.
Esta acción formativa é gratuíta e está destinada a un máximo de 15 personas. No seu decurso abordaranse cuestións como: viño (orixes e cultura), viticultura (morfoloxía da vide, ciclo vexetativo, factores de produción), enoloxía (vinificación de viño branco, tinto, rosado e escumosos), xeografía enolóxica, cata (análise sensorial, técnica, vocabulario de cata) ou servizo de viños (accesorios, temperaturas, descorche, maridaxes), entre outros temas.
O curso estará dividido en tres sesións que terán lugar os días 21 de abril (1ª sesión de 18 a 20.30 horas), 22 de abril (2ª sesión de 11 a 13.30 horas)e o 28 de abril (3ª sesión de 18 a 20.30 horas). Desenvolverase na adega Alba Al-Bar S.L. (Daniel Fernández) e será impartido por Iria Otero (licenciada en Farmacia -Universidad de Santiago de Compostela- e Enoloxía –Universidade da Rioxa-, con longa experiencia en adegas e formación en Galicia, Rioxa e Navarra).
As persoas interesadas en asistir a este curso poderán inscribirse previamente na sede do C.R.D.O. Monterrei (Avda. Luis Espada, 73 Baixo. Verín // Tlf. 988 590 007 // Correo electrónico: info@domonterrei.com). A inscrición farase por rigurosa orde de entrada.
