Moita participación tanto na carreira de maiores como nas citas das categorías inferiores na oitava edición da Carreira dos Santiños do Barco, celebrada na mañá do 8 de novembro. O disparo do xuíz daba a saída ás doce en punto no estadio de Calabagueiros á proba dos maiores, na que os atletas cadetes daban unha soa volta a un circuíto urbano de 3,6 km, mentres que o resto das categorías completaban dúas voltas.
O primeiro en cruzar a liña de meta, situada no mesmo estadio, era o corredor berciano Eduardo Valcarce (Fisiorama), seguido de Elipio Gómez e Hugo Sánchez, ambos do Club Adas. Os mellores resultados en absoluta feminina eran para Eva Arias, Joanna Filipa Pereira e Iria Fernández, as tres co Adas.
Ao redor da unha comezaban as probas dos atletas máis xoves: infantís, alevíns, benxamíns e prebenxamíns. Todas elas desputábanse nas pistas de Calabagueiros. E rozando ás dúas da tarde tiña lugar o acto de entrega de trofeos. Esta edición dos Santiños abría ademais o Circuíto de carreiras populares “Comparte un Valdeorras” e nela a Cruz Vermella facía unha recollida de xoguetes solidarios. A cita foi organizada polo Club Adas Proinor en colaboración co Concello do Barco e coa Delegación Valdeorresa da Federación Galega de Atletismo (FGA).
Fotos: Ángeles Rodríguez
Máis información e fotos na edición en papel de decembro do Periódico O Sil