O PSdeG reivindicará no Parlamento galego a declaración da Ribeira Sacra como Patrimonio da Humanidade

Xaquín Leiceaga anunciaba, en dous actos celebrados nesta zona ourensá e lucense, que preguntará no vindeiro pleno sobre o estado do proceso de declaración

Primeiro en Castro Caldelas e, unha hora despois, en Monforte de Lemos. O PSdeG-PSOE celebraba na mañá do 20 de abril sendos actos, coa presenza do portavoz do grupo parlamentario socialista Xaquín Leiceaga, para dar a coñecer as iniciativas dirixidas a reivindicar a declaración da Ribeira Sacra como Patrimonio da Humanidade que ten previsto presentar no pleno do Parlamento galego.

No caso da vila ourensá, o acto tiña como escenario o patio do Castelo e comezaba cunha intervención da alcaldesa de Castro Caldelas, Sara Inés Vega, quen resaltaba que lograr esa declaración para este territorio da cabalo entre as provincias de Ourense e Lugo “é o impulso que falta para que a zona empece a despegar. Estamos no oriente ourensán, temos tamén a parte lucense, é un territorio fantástico en canto a monumentalidade, a historia, paisaxe, pero necesitamos ese apoio porque temos unha zona envellecida, que pouquiño a pouco parece que vai empezando a rexurdir, pero por parte dos poderes públicos necesitamos ese espaldarazo. A Ribeira Sacra necesita esta declaración”.

De seguido tomaba a palabra o deputado socialista ourensán Raúl Fernández, quen incidía en que “estamos nun lugar emblemático e tamén típico do interior de Galicia, cunha acusada despoboación, e tamén envellecemento da propia poboación e, sen embargo, cuns recursos impresionantes: agrogandeiros, monumentais, culturais, paisaxísticos, cunha serie de potencialidades que aínda estando asentados neses principios é necesaria a intervención das diferentes administracións para dar un salto definitivo e poñer todo en valor. E nesa liña vai a iniciativa que presentará o PSdeG-PSOE no Parlamento”.

Dela daba conta Leiceaga e adiantaba que os socialistas levarán ao pleno da próxima semana unha pregunta oral para reclamar “un compromiso firme en sede parlamentaria” neste senso por parte da Xunta. O portavoz socialista no Parlamento galego lembraba que, logo “dun certo empuxe e ilusión inicial en canto a poñer en marcha o proceso de declaración de Patrimonio da Humanidade para a Ribeira Sacra, levamos case dous anos nos que o proceso semella estar paralizado”. Por iso pedíalle ao goberno galego un calendario “crible, realista e dilixente” para tramitar diante da Unesco esa petición de declaración.

Asemade neste mesmo acto, que contaba coa presenza de representantes do PSdeG da zona de Trives-Caldelas, o portavoz socialista na Deputación de Ourense, Francisco José Fraga, matizaba que “vemos como na Deputación continuamente o PP presenta mocións para museos, o da emigración, o dos Bolechas… aquí temos o museo sobre o territorio, entón qué máis ca isto. Nós o que dicimos é que dunha vez se tome isto como hai que collelo, que nos poñamos mans a obra e que haxa un compromiso das administracións”.

A continuación, Leiceaga trasladábase a Monforte de Lemos, onde presentaba a iniciativa na parte lucense da Ribeira Sacra, xunto co alcalde deste concello, José Tomé, o presidente da Deputación provincial, Darío Campos, e os deputados autonómicos José Antonio Quiroga, Concepción Burgo e Luis Álvarez.

O alcalde de Monforte reivindicaba ademais unha declaración Patrimonio da Humanidade “compatible co desenvolvemento rural” e compatible coas actividades agrogandeiras que “foron precisamente as que ao longo dos anos moldearon a paisaxe natural e conformaron o entorno que hoxe temos”.

 

Fotos: Carlos G. Hervella (agás a última imaxe da galería que é cedida).

 

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR