A Oficina de Turismo de Celanova volverá abrir ao público durante os domingos pola mañá, así como festivos, “completando deste xeito a oferta de servizos para unha demanda turística que está crecendo dun xeito moi evidente nos últimos meses”, apuntan dende o Concello, e coordinando estas visitas co servizo de atención ó visitante que ofrece a Fundación Curros Enríquez dende a Casa dos Poetas e dende a torre de Vilanova dos Infantes.
En virtude do convenio de colaboración asinado entre o Concello de Celanova e a Fundación Curros Enríquez, a Oficina de Turismo e a Casa dos poetas, conseguiron coordinar os horarios para poder atender á demanda turística, non só do Mosteiro de San Rosendo e da Casa dos Poetas, senón tamén do conxunto urbano de Vilanova dos Infantes e do conxunto arqueolóxico de Castromao, durante tódos os días da semana, agás o luns.
O acompañamento ofrécese tanto para estes puntos referenciais xa nomeados, como para un paseo polo conxunto urbano a través dos poetas de Celanova, a torre de Vilanova dos Infantes ou a cova do SanVivián.
