O Campus de Ourense xa conta de novo, dende o pasado 16 de xaneiro, cunha residencia para acoller aos seus estudantes. Esta mañá, o alcalde de Ourense, Jesús Vázquez e o vicerreitor do Campus, Virxilio Rodríguez fixeron un percorrido polas instalacións canda a conselleira delegada da empresa concesionaria Resa, xestora das residencia, Mónica Garay.
O centro estivo pechado case dous anos e medio para acometer as obras de urbanización necesarias para que puidese obter de novo a licenza de apertura. Tanto o rexedor municipal, coma o Vicerreitor e a representante de Resa coincidiron no dificultoso que foi o proceso de reapertura, e que agora están contentos de que se resolvese o problema e que a Residencia Universitaria volva a estar de novo en funcionamento. Jesús Vázquez salientou que esta instalación “é un servizo necesario para a comunidade universitaria e é esencial para un campus que está crecendo”. Vázquez Abad sinalou que asemade é beneficioso para a economía da cidade xa que xera “oito postos de traballo, entre directos e indirectos”. Pola súa banda, o vicerreito, Virxilio Rodríguez, dixo o seguinte desta reapertura: “a residencia é un servizo fundamental para o noso campus, polo que estamos moi satisfeitos por volver a contar con ela”.
A Residencia Universitaria As Burgas conta con 133 habitacións individuais e 65 individuais con cociña compartida. Asemade, o centro dispón de 6 habitacións dobres con cociña incorporada que abrirán no caso de necesitar máis prazas. Dende Resa apuntan que todas as habitacións están equipadas con mobiliario, son exteriores e teñen baño propio, cociña e conexión á internet. Entre as vantaxes que ten a Residencia das Burgas, subliñou Mónica Garay, están a “ubicación excepcional” e apuntou que “é un sitio fantástico para pasar os anos universitarios”. Ademais, os inquilinos poden usar os espazos comúns, como salas de estudo, televisión, ximnasio e lavandería, e os servizos como aparcadoiro ou limpeza de habitacións.
En canto ao prezo da estancia, como oferta de reapertura, a residencia dá a oportunidade de alugar unha habitación individual de xaneiro a xuño por 196,80 euros ao mes, fronte ao custe estándar de 328 euros mensuais. Nestes momentos hai 26 inquilinos entre os cales hai estudantes estranxeiros de Portugal, Vietnam ou México.