O Servizo de Neuroloxía do CHUO e a Unidade de Formación Continuada da EOXI organizan por segundo ano consecutivo os chamados “Seminarios Neurolóxicos” que teñen como obxectivo a posta en común de coñecementos e do abordaxe e tratamento das patoloxías máis frecuentes no ámbito da neuroloxía abordadas desde un punto de vista multidisciplinar xa que interveñen asemade moitos dos servizos do CHUO: Medicina Interna, Neurocirurxía, Oftalmoloxía, Enfermidades Infecciosas, Oncoloxía, Psiquiatría ou Rehabilitación.
Estes seminarios constan de dez sesións, cunha periodicidade mensual, e nesta segunda edición trátanse temas como a cefalea, a enfermidade cerebrovascular, a epilepsia, os trastornos do movemento, as demencias ou as enfermidades neuromusculares entre outros.
A xornada formativa de hoxe aborda a epilepsia, o seu manexo e os novos tratamentos, nun seminario moderado polo Xefe de Servizo de Neuroloxía do CHUO, Daniel García Estévez, e nas que tamén participan Enrique Corredera García, Unidade de Epilepsia do Servizo de Neuroloxía do CHUS (Santiago) , Dolores Castro Vilanova, Servizo de Neuroloxía do CHUVI (Vigo) e Antonio Pato Pato, do Servizo de Neuroloxía do Hospital POVISA de Vigo.
Esta actividade vai destinada a estudantes de grao, residentes das diferentes especialidades e persoal facultativo tanto de especialidades médicas hospitalarias como de atención primaria. Ademais esta recoñecida pola Fundación Biomédica Galicia Sur e conta aval científico da Sociedade Galega de Neuroloxía.
