Ourense acolle este sábado o campionato galego de rutinas de nivel de inverno de natación sincronizada

Na competición, que comezará ás 16:45h. na piscina Rosario Dueñas, participarán sete clubs galegos

Presentación do campionato no Concello de Ourense.

Este sábado 18 de febreiro celebrarase na piscina Rosario Dueñas de Ourense, o campionato galego de rutinas de nivel de inverno de natación sincronizada, organizado de forma conxunta pola Federación Galega de Natación (FEGAN) e polo Club Sincro Ourense.

A presentación da competición tiña lugar na mañá do 16 de febreiro no Concello de Ourense, e alí explicaron que  comezará ás 16:45h. co quecemento oficial previo con pase de música. Primeiro celebrarase a competición de combos alevíns, seguida da de combos infantís e finalizando cos combos júnior-absoluto, con podio en cada unha das tres categorías de competición, así como un trofeo ao club campión galego de inverno.

Tal como explican dende a organización, trátase dunha competición de rutinas combinadas (combos), na que se realizan coreografías grupais de entre 4 e 10 nadadoras con acompañamento de música. “Este tipo de coreografías réxese pola normativa da Federación Internacional de Natación (FINA), na que se especifica que durante a coreografía debe haber partes de só, dúos, cuartetos, sextetos e outras partes nas que deben participar todas as compoñentes do grupo”, din dende o Sincro Ourense, especificando que “a duración dos combos alevíns é de 3 minutos 30 segundos, a dos infantís de 4 minutos e a dos júnior-absolutos de 4 minutos 30 segundos”. As coreografías serán evaluadas por un xurado composto por 9 xuíces: 3 valorarán a parte artística (40% da nota final), outros 3 calificarán a dificultade  (30% da nota) e o resto evaluarán a execución (30% da nota).

 

A presidenta do Club Sincro Ourense e o concelleiro de Deportes de Ourense, na presentación.

Na competición do sábado participarán os 7 clubs galegos da categoría de nivel: Portamiñá de Lugo participará cun combo alevín e outro júnior-absoluto; o Club Rías Baixas de Vigo presentará un combo júnior-absoluto; e os Clubs Sincro Pontevedra, Sincro Ferrol, Galaico Sincro de Pontevedra, Real Club Náutico de Vigo e o anfitrión, Sincro Ourense, presentarán tres coreografías cada un: unha alevín, unha infantil e outra júnior-absoluta. En  total serán 18 os combos participantes no campionato.

 

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR