Ourense dá un paso máis na visibilización da súa riqueza termal. Dende hoxe pasa a formar parte da Asociación Europea de Cidades Termais Históricas, tras a votación celebrada durante a asemblea xeral do colectivo, que tivo lugar o 19 de outubro en Salsomaggiore (Italia). A representación ourensá estivo liderada polo presidente da Deputación, Manuel Baltar, que valorou o ingreso como “un pulo importante para a internacionalización do noso termalismo e da marca Ourense”.
A Asociación Europea de Cidades Termais Históricas integra a 40 membros de 13 países, entre os que figuran destacados territorios termais como Baden Baden, Bath, Budapest ou Vichy. “Formar parte da rede termal máis importante de Europa favorecerá de maneira determinante o posicionamento, a promoción e a difusión das singularidades do noso termalismo”, engadiu Baltar, quen tamén foi felicitado polo colectivo polo labor realizado na potenciación da riqueza termal da provincia.
