A Pobra de Trives celebra as festas patronais

O Cristo, os días 13 e 14 e a Dolorosa, os días 16 e 17, son as dúas citas de referencia no mes de setembro

Procesión do Cristo o 14 de setembro polas rúas de Trives. /Foto: Carlos G. Hervella.

Tres semanas despois das festas de San Bartolo, A Pobra de Trives celebra as patronais, nas que comparten protagonismo dúas figuras relixiosas: O Cristo e a Dolorosa.

Os festexos na honra ao Santísimo Cristo comezan mañá mércores 13 de setembro, con baile en sesión de tarde e verbena a cargo da orquestra Ledicia, pero non será ata o día seguinte, xoves 14 de setembro, cando teñan lugar os actos centrais. O programa abrirase en torno ás 10:30h. co pasarrúas da Banda de Música Cultural de Arcade (Pontevedra) e xa ás 12h. terá lugar a tradicional procesión co Cristo polas rúas da vila, seguida da misa solemne. A banda volverá actuar pola tarde, cun concerto pervisto para as 19h. e o baile correrá por conta do grupo Assia.

A fin de semana chegará coas actividades na honra á Dolorosa. Para o venres día 15 hai previsto un campionato de dardos e futbolín e para o sábado día 16, un pasarrúas a cargo da banda de gaitas Os Trintas; campionatos de pádel e tute; e baile en sesión de tarde e verbena coa orquestra Hiroshima.

 

Baile nas festas de San Bartolomé en agosto.

O día grande será o domingo, 17 de setembro, e arrancará co pasarrúas da Banda da Escola de Música de Barbadás. A misa solemne na honra á Dolorosa será ás 12:30h. seguida da multitudinaria procesión que rematará coa sesión vermú da charanga Triple B. Ese día serán as finais do campionato de pádel e a Banda de Barbadás dará un concerto na praza do Pilón ás 19h. O fin de festa correrá por conta da orquestra Santiago.

Máis información na edición en papel do Periódico O Sil.

 

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies