A Policía Nacional desarticulou unha banda de cinco persoas que se dedicaban a cultivar plantas de marihuana nunha nave de San Cibrao das Viñas, en Ourense. Os axentes incautaron onte, 10 de outubro, un total de 3.858 plantas de marihuana e acusaron a eses cinco detidos de seres os presuntos autores dun delito contra a saúde pública.
As detencións foron na madrugada do 10 de outubro. Os rexistros foron realizados na provincia e un en Madrid. Na entrada á nave de Ourense, os axentes detiveron a tres persoas chinesas que estaban a cargo desta plantación ilegal. No rexistro de Madrid foron detidas as dúas restantes. Finalmente o xuíz decretou o ingreso en prisión dos tres detidos en Ourense na tarde de hoxe, 11 de outubro.
Segundo aportan fontes policiais, a banda acondicionou devandita nave “cun sofisticado circuíto ilegal eléctrico, así coma unha complexa rede de extractores para evitar a detección da plantación”. Asemade, na planta baixa desta nave había varios habitáculos, contan, acondicionados como dormitorios e cociña, “na que se atoparon grandes cantidades de comida”, aseguran dende a Comisaría.
En canto a ese sofisticado circuíto de aire e filtros de carbono para evitar os olores. Os axentes sinalaron que nesta nave “deron un paso adiante” para dificultar a detección. Para que non os descubrisen pola calor irradiada polas lámpadas, os detidos “compartimentaron a superficie da nave en habitáculos en modo ‘ortos’ onde se atoparon as plantas en distinto estado de desenvolvemento” todos illados e con sistemas de refrixeración “de modo que eliminan case por completo a sensación de calor, dificultando o uso de cámaras térmicas”, explicaron.
No eido das medidas de seguridade, a banda colocou cámaras para controlar os movementos de persoas e vehículos no exterior da nave, “cuxo visionado facíase dende o monitor instalado nun dos compartimentos que facía, ás veces, de dormitorio dun dos detidos”, contaron fontes policiais.
Os arrestos foron feitos en Ourense e en Madrid. Dende a Comisaría de Ourense reiteran que esta supón a terceira fase dunha investigación que arrancou tras as detencións practicadas nos meses de setembro e xullo deste ano, “cuxo número ascende a 33 individuos detidos até o de agora no territorio nacional”.
Devanditas investigacións permitiron que os axentes atopasen esta nave en San Cibrao, acondicionada para o “cultivo in door” de marihuana, ademais de dispor de dous pisos de seguridade, un en Madrid e outro en Ourense.