En torno ás catro e media do 22 de abril, abría as portas a Feira do Libro do Barco de Valdeorras. Por segundo ano consecutivo, na praza Andrés de Prada están instalados os stands dos dez establecementos e asociacións que participan nesta ocasión: Biblioteca Florencio Delgado Gurriarán, Libraría Lipor da Rúa, Ateneo Republicano, Libraría Praxis do Barco, Asociación Vagalume, Instituto de Estudos Valdeorreses, Libraría Murciego do Barco, Xornal O Sil e Cine Club Groucho Marx.
A feira compleméntase con diferentes actividades como a exposición “FDG: Bebedeira de ensoños” na biblioteca (na tarde do sábado foi presentada por Ricardo Gurriarán e Ángel Fernández); o obradoiro de escritura creativa para novos escritores na biblioteca (sábado e domingo ás 11h.); o concurso de microrrelatos para todos os públicos; e os contacontos o sábado e o domingo ás 12h. na ludoteca.
Mañá, domingo 23 de abril, Día do Libro, a feira abrirá as portas ás 10:30h. e Florencio Delgado Gurriarán estará de novo presente na música de O Son do Vento, grupo formado por Eduardo Gómez, Roberto Fernández e Suso Rodríguez que musicalizaron poemas do poeta de Córgomo nun concerto sesión vermú previsto para as 13:30h.
A última iniciativa posta en marcha este ano será o sorteo de lotes de libros, dvds e cds de autores da comarca, entre todos os asistentes que adquiran produtos no recinto feiral que pechará as portas en torno ás oito e media da tarde.
Fotos: Mónica G. Bellver.
