Ao longo do ano 2017 máis de 400 empresas colaboraron con Cruz Vermella en distintos ámbitos. Segundo os datos facilitados pola organización, dende o Plan de Emprego contactaron con 230 empresas da provincia, coas que se realizaron 466 colaboracións de diferente tipo: firma de convenios de colaboración, intermediación de ofertas de emprego, participación en sesións de orientación, ou a participación na selección de candidatos para os cursos de capacitación e a posterior acollida para a realización de prácticas non laborais nos seus centros de traballo.
Para agradecer e recoñecer as distintas colaboracións realizadas polo tecido empresarial ourensán co labor social de Cruz Vermella na provincia, organizáronse actos no Barco de Valdeorras e Ourense. O de Valdeorras tiña lugar na tarde-noite do 29 de novembro no Teatro Lauro Olmo. Un acto presentado por Ainhoa Carracedo de Alba e María Fernández Martínez no que se entregaron os recoñecementos a máis de 50 empresas entre elas, o Hotel Monumento Pazo do Castro, O Barco Centro Comercial Aberto, O Hospital Comarcal Valdeorras, O Prenda Outlet, Miranda Moda, ou Sala Baranda.
O acto enmárcase no proxecto “Reto Social Empresarial en materia de inserción laboral: Alianzas” e contou coa presenza do equipo directivo e técnico da organización, e a intervención de Noelia Mayo, responsable do proxecto e de Lina Beatriz, unha das participantes no programa que contou a súa propia experiencia.
Fotos: Mónica G. Bellver.
