Investigadores, científicos, estudantes e profesionais do mundo da pedra, da arte e da restauración danse cita nesta fin de semana en Parada de Sil. Ata o domingo 23 de outubro a Fábrica da Luz acolle o curso “Alteración, análise, prevención e tratamento do granito”, dirixido por Carmen Gómez Feito e Gonzalo Buceta Bruneti.
Na apertura deste foro, o 21 de outubro, Carmen Gómez agradecía o apoio das institucións e aludía ao Concello de Parada de Sil como “referente en Galicia na posta en valor dos recursos naturais e históricos como fonte de ingresos económicos”. Pola súa banda o concelleiro de Cultura de Parada de Sil, Francisco Magide, aseguraba que “a aposta que dende hai anos vimos facendo pola cultura resulta un investimento rendible económicamente e sostible no tempo”. Ademais pedía unha reflexión aos expertos para ver cómo actuar na conservación cos moitos restos arqueolóxicos que existen neste municipio ourensán, entre eles a necrópole de San Vítor de Barxacova. Asimesmo, convidaba aos asistentes a disfrutar de Parada e voltar para descubrir a sua beleza e o seu engado particulares.
Nestas xornadas están a participar un recoñecido grupo de profesionais do eido académico e científico, así como do empresarial, entre os que se atopan Benita Silva Hermo (doutora en Ciencias Químicas e profesora na USC), Teresa Rivas Brea (doutora en Ciencias Biolóxicas e profesora da USC), María Eugenia López de Silanes (doutora en Ciencias Biolóxicas, Universidade de Vigo), Cristina Montojo Santos (Profesora da ESCRBCG), Fernando Carreira Ramírez (doutor en Historia e profesor na ESCRBCG), E. Bregan Neto (arqueólogo), Gonzalo Buceta Bruneti (conservador-restaurador) e María José Yravedra Soriano (doutora en Arquitectura).
Ademais de asistir ás charlas, os asistentes (chegados de diferentes puntos da península) visitarán o Mosteiro de Santa Cristina, a citada necrópole medieval de San Vítor de Barxacova e outras empresas locais colaboradoras.