A sede do Consello Regulador do Ribeiro convertíase o 2 de xuño en escenario dunha xuntanza entre o presidente da Deputación de Ourense, Manuel Baltar, e os presidentes das catro denominacións de orixe vitivinícolas da provincia de Ourense: Ribeiro, Valdeorras, Monterrei e Ribeira Sacra.
Na xuntanza, Manuel Baltar solicitáballes aos presidentes destes consellos que plantexen proxectos para seren incluídos nos orzamentos de 2016, que se aprobarán en setembro. Asemade, o portal web “Enourense”, de comercialización para as adegas das catro D.O. ourensáns, e a avaliación da Feira Vinis Terrae formaron parte tamén dos temas tratados na xuntanza.
A Deputación de Ourense e os consellos reguladores seguirán a manter estes encontros, logo dos celebrados en Ourense e no Ribeiro, coa finalidade de planificar estratexias de promoción, modernización tecnolóxica e outras actividades vencelladas á promoción e comercialización, coa colaboración do Inorde. A vindeira reunión terá lugar na sede do Consello Regulador da D.O. Valdeorras, en Vilamartín.
