A Xunta Local de Seguridade de Ribadavia reuniuse hoxe, 27 de xullo, no Concello. O acto estivo presidido polo subdelegado do Goberno, Roberto Castro, e o alcalde da localidade, José Ignacio Gómez, e na que participaron os membros dos Corpos e Forzas de Seguridade do Estado e Policía Local.
Os representantes das diferentes Forzas de Seguridade estatais e locais foron dando conta dos informes en materia de seguridade cidadá e fixeron fincapé na importancia na colaboración entre corpos. Entre os datos achegados en devanditos informes relativos á delincuencia, durante o 2016 e principios de 2017, achegan unha baixada importante das infraccións penais nos primeiros seis meses deste ano con respecto ao pasado. Ese descenso, explicaron, viuse máis acusado nos delitos graves e menos graves. En canto ao número de esclarecementos, supera en ambos os dous casos o 80%.
Pola contra, Ribadavia experimentou un ascenso leve nas infraccións penais e delitos contra a seguridade viaria e as infraccións administrativas. Así mesmo, tamén se incrementan o número de detidos.
En canto ás previsións en materia de seguridade para o que resta de ano, aseguraron que porán especial atención no dispositivo que se establecerá para a celebración da Festa da Istoria, a finais do mes de agosto, e das Festas do Portal, a primeiros de Setembro. As distintas festividades, que durante o verán se desenvolverán na comarca, tamén foron obxecto de estudo e predición no derradeiro apartado da Xunta Local de Seguridade.
Neste senso, o subdelegado do Goberno, Roberto Castro, subliñou que “dende a prudencia coa que se teñen que valorar as estatísticas, amoso a miña satisfacción polos resultados acadados en materia de seguridade nesta comarca”, tamén engadiu que “soamente poden ser froito do traballo rigoroso das Forzas e Corpos de Seguridade e a Policía Local e da súa extraordinaria coordinación”.
