A vindeira fin de semana (21 e 22 de outubro), o Auditorio Municipal de Verín acollerá a representación das obras “Sganarallo o cornudo imaxinario” do grupo de teatro Vai Avante; e “Caixa Pazpallo, caixa do k…” do grupo de teatro Oreteiro. Estas representacións están enmarcadas dentro da VIII edición do Festival de Teatro Entreculturas, organizado pola Asociación para a Cultura e o Lecer: A Caixa de Pandora en colaboración do Concello de Verín.
O Grupo de Teatro Vai Avante que actuará o día 21, pertence a Associação Social Recreativa e Cultural Bem Fazer Vai vante de São Pedro da Cova (Gondomar). A obra que representarán é un exemplo de teatro clásico escrita por Molière no ano 1660. Trátase dunha farsa chea de enredos e sospeitas na que os personaxes pensan que as súas esposas, noivas ou parellas adican todos os seus esforzos amatorios a outras persoas alleas a eles.
O grupo de teatro Oreteiro de Allariz que actuará o día 22, volta á escena cun novo traballo con guión de creación propia, modelado por todo o grupo sobre unha base dun texto orixinal de Pepe. A obra xira en torno ás historias que se contan, se viven, se sofren e se comparten nunha caixa de aforros dunha vila calquera pola que pasa moita xente.
Para acceder a cada unha das obras teatrais, que terán lugar ás 20:30 horas, será necesario realizar unha achega de 3 euros que a asociación destinará a sufragar o aloxamento e a manutención dos case 200 actores que participan no festival.