Foliadas da Rabeda e da Peroxa, Pandeirada de Ourense, Foliadas de Luintra, Canto a Ourense, Ourense no solpor,… Son algún dos temas que a Coral De Ruada interpretaba na noite do 24 de novembro no Teatro Lauro Olmo do Barco de Valdeorras.
O concerto forma parte do programa da Ourensanía patrocinado pola Deputación de Ourense que levará ao coro ourensán por varias localidades da provincia, acompañado polo seu grupo de instrumentos populares (gaitas, percusión e zanfona), e dirixido polo seu director artístico, Xoán Antón Vázquez Casas.
Tal como avanzan dende a coral, o repertorio está formado por cantigas populares relacionadas coa provincia Ourense e con respecto ás polifónicas “tanto letristas como músicos son ourensáns, coa excepción da cantiga O quer que lle quer, popular con harmonización do músico vallisoletano afincado na Coruña, Mauricio Farto, unha das primeiras que gravou a Coral en 1929″, puntualiza Emilio, vicepresidente da coral.
Despois da actuación no Barco de Valdeorras que contou coa colaboración do Concello, xa no mes de decembro, a xira da Ourensanía levará á Coral de Ruada ata Montederramo (día 8), Celanova (día 12), Vilamarín (día 16), Castrelo de Miño (día 17), Xinzo de Limia (día 22), Bande (día 23), Viana do Bolo (día 29) e Cea (día 30).