Unións Agrarias saca adiante unha iniciativa popular para pedir axudas directas ao rural

O sindicato recadou 2.700 sinaturas e a moción vaise debater o vindeiro ano no Parlamento de Galicia

José Ramón González e Carlos Basalo. // Foto: Carlos Asensio.

Unións Agrarias anunciou hoxe, 5 de novembro, que o Parlamento galego vai debater no 2018 unha iniciativa lexislativa popular a favor das axudas directas para a viticultura e produtores de castañas da provincia afectados polas xeadas, seca e sarabia. “Isto faise despois de que a Xunta electoral verificase o número de sinaturas que ratifican o apoio”, explicou o responsable de Agricultura do sindicato, José Ramón González.

Concretamente facían falta 2.500 rúbricas para que a proposta chegase até o Hórreo; pero González asegurou que “foron máis de 2.700” os apoios que recibiron para que se leve a debate esa necesidade de axudas “que palíen esas dificultades” dos agricultores e gandeiros debido aos fenómenos meteorolóxicos acaecidos no 2017.

O voceiro de UU.AA. , Carlos Basalo, dixo que con esta iniciativa o que pretenden é “reclamar esas axudas directas, a fondo perdido, para os produtores agrarios “como se fixo na Ribeira Sacra no seu tempo” e que contemplan un teito de 15.000 euros por explotación ou 7.000 euros por hectárea de terreo afectada polas xeadas, o pedrisco, a seca ou os lumes forestais.

Asemade, tamén van solicitar unha bonificación nas cotas do 95% nas cotas da Seguridade Social “e rebaixas no IRPF” namentres haxa unha merma considerable nos ingresos.

Dende o sindicato están a traballar agora en contactos cos grupos políticos representados na Cámara galega para “buscar apoios”, dixo José Ramón González, para esta iniciativa.

O responsable de Agricultura de Unións Agrarias reiterou que “co apoio dos deputados ourensáns do Partido Popular sería máis que suficiente para que saíse adiante a iniciativa”. Asemade, asegurou que esta iniciativa lexislativa popular é unha chamada de socorro do rural galego.

Pola súa banda, Carlos Basalo reiterou “a falta de apoios dende Medio Rural”, lembrando que a conselleira “prometeu que se ía reunir con nós e aínda non tivemos resposta”. Asemade, asegurou que o rural precisa “de xeito urxente” esas axudas directas “senón Ourense vaise converter nun couto de caza”, sentenciou.

Texto: Carlos Asensio.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies