Dúas etapas e uns 30 quilómetros é o que lles resta aos peregrinos do Bierzo e Valdeorras que están facendo o Camiño de Inverno por etapas. A décima, entre Lalín e Bandeira completábana no mediodía do sábado 25 de marzo, un fermoso día no que uns 130 camiñantes percorrían os 23 quilómetros por fermosas paraxes, a maioría naturais.
A saída, coma sempre estaba programada para as nove da mañá e nesta ocasión, ao grupo de Valdeorras e O Bierzo uníase outro de Lalín e Monforte, co que compartiron camiño, risas e diversión, xa que se algo destaca desta iniciativa, organizada pola Asociación Camino de Santiago de Invierno do Bierzo, é aparte de descubrir fermosos rincóns e dar a coñecer a ruta xacobea, o aspecto social, divertíndose e creando lazos de amizade.
Ao remate da ruta, tiña lugar coma sempre o xantar, desta volta fideuá, no restaurante Conde Rey que lles cedeu o local.
Fotos: Miguel López.
