Do XIII Congreso do Socialismo Galego, celebrado nesta fin de semana en Santiago, sae unha nova executiva federal socialista formada por 49 persoas, que contará con tres vicesecretarías e estará presidida por Xoaquín Fernández Leiceaga. Da nova executiva do secretario xeral do PSdeG, Gonzalo Caballero, formará parte un valdeorrés, o alcalde de Petín, Miguel Bautista, que se ocupará da área de Emigración. Dentro deste equipo hai asemade outros nomes ourensáns como é o caso de Francisco Fumega (alcalde do Carballiño) dentro da área de Política Municipal, Elvira Lama (Comercio) ou Concepción García (Comité Federal). A nova executiva lograba un respaldo do 71,18% dos asistentes ao congreso.
Na xornada de clausura, na mañá do día 29 de outubro, Caballero referíase a unha nova etapa no PSdeG e presentaba un partido máis aberto e máis activo, “recuperemos o estar presente na sociedade” e crear “unha alternativa de esquerdas”. A súa meta será construír “unha coalición social de progreso, co activismo social, os sindicatos, os movementos agrarios, e as ongs”. Se hai tantos vectores de cambio, de insatisfeitos coa dereita, “hai que ordenalos detrás do PSdeG para cambiar o Goberno do PP”.
Tamén poñía a mirada nas vindeiras eleccións locais do 2019. “Comecemos a traballar polas municipais”. Neste senso, Gonzalo Caballero instaba aos seus compañeiros a recordar á cidadanía a nosa capacidade de Goberno” demostrada ao longo da historia. Só os socialistas son a garantía de “gobernos estables como alternativa á dereita e á ineficacia e demagoxia doutras formacións que teñen emerxido”, dixo.
Dende o punto de vista orgánico, aludía á recuperación da estrutura comarcal, que reforzará o apoio aos concellos. Defendía tamén a autonomía do PSdeG dende a lealdade ao partido socialista. Despediuse dos delegados e delegadas lembrando que “todos somos instrumentos ao servizo dunha causa: o interese xeral da cidadanía galega, que nos agarda”.
Caballero agradecía ademais a presenza no XIII Congreso do secretario xeral do PSOE, Pedro Sánchez. “Se aproveitamos as primarias, e o ciclo electoral que se abriu con esta consulta”, que asimilou ao de outros momentos como o de Felipe González ou Zapatero, “poderemos lograr o cambio en España, acabar cun goberno sen proxecto e inmerso na corrupción como o do PP”. O cambio, asegurou, “só será posible co impulso do PSOE e presidido por Pedro Sánchez”.
Pola súa banda Pedro Sánchez felicitaba a Gonzalo Caballero polo seu novo cargo e trasladáballe o “apoio decidido” de toda a Executiva Federal para que comece a traballar xa para os comicios de 2019. Do PSdeG destacaba que, cando gobernou en Galicia, demostrou que, para a esquerda, “o prioritario son as persoas antes que os territorios”.