Vilamartín lembra aos falecidos no accidente de autobús de 1977

As familias das vítimas escolares organizaron un acto conmemorativo cando se cumprían 40 anos da traxedia

Os compañeiros dos falecidos que sobreviviron ao accidente, presentes no acto.

Mª José Arias Álvarez, Ana Mª Diéguez Álvarez, Manuel Fernández López, Miguel Ángel Fernández López, Manuel Ángel González Folla, Mª Carmen González García, Mª Teresa González Losada, Mª de los Ángeles López Losada, Manuela López Sotelo, Mª Jesús Losada Núñez, Francisca Simón Rodríguez e José Trincado Vicente. Son os doce nenos de entre seis e catorce anos que falecían ao caer por un terraplén o autobús que os levaba dende Vilamartín de Valdeorras ata A Rúa, nun fatídico día de 1977.

 

Gelines Trincado no acto, en representación dos familiares.

Ese tráxico accidente no que tamén falecía o condutor do autobús, Manuel González Pérez, conmocionou a toda a comarca de Valdeorras “converténdose nun val de bágoas, e dun xeito moi especial aos veciños de Vilamartín e San Miguel, privándonos para sempre de doce sorrisos infantís”. A que fala é Gelines Trincado, directora do CEIP Xosé Manuel Folla Respino e irmá dun dos falecidos, que daba voz aos familiares que na tarde do 19 de abril, data na que se celebraba o corenta anivesario, organizaban un acto conmemorativo para lembrar  ás vítimas. “Nuns segundos que nunca deberon existir, perderon a vida os nenos e nenas que como cada día ían felices ao colexio, pero… nunca chegaron”, dixo Gelines diante do monumento ubicado a carón da igrexa parroquial de Vilamartín de Valdeorras (lugar elixido pola maioría dos familiares) in memorian dos doce cativos.

 

O momumento adicado ás doce vítimas infantís.

O 19 de abril de 1977 foi sen dúbida a data máis triste da historia do municipio valdeorrés, e as 14:35 a hora á que se parou o reloxo vital dos falecidos e se conxelou parte da vida dos que quedaron. “Xa nada foi igual”, asegurou Gelines, xa que “a morte levonos a moi curta idade, apagando todos os seus soños e ilusións e pasando a vivir con nós, en nós. Eran os nosos irmáns, fillos, amigos, compañeiros… A alma e o futuro deste concello”.

 

Un momento da misa de aniversario, na igrexa de Vilamartín de Valdeorras.

 

Asistentes á misa.

 

 

Foi unha traxedia colectiva que a comarca non esquecerá nunca, e moito menos os que dalgún xeito están directa ou directamente implicados. Foron trece os falecidos, pero no autobús que como cada día levaba aos cativos ao colexio na Rúa despois de comer, ían máis de vinte. O resto resultou ferido de maior ou menor consideración e na tarde de hoxe, todos ou case todos, xunto a moitos veciños de toda Valdeorras asistían á ofrenda coa que lles rendían homenaxe, antes de celebrar a misa de aniversario oficiada polo párroco das Ermitas (D. Eladio non pudo asistir por motivos de saúde).

 

Na placa figuran os nomes dos doce cativos.

 

Os compañeiros dos falecidos cos nenos que fixeron a ofrenda floral e Gelines Trincado.

 

Familiares dos falecidos do accidente.

Ninguén destas terras borrará xamais das súa mente o acontecido, unha traxedia que destruíu familias enteiras e, cada ano por estas datas celebran unha misa de aniversario aínda que a de hoxe, 19 de abril de 2017, cos recordos e as emocións a flor de pel e malia o tempo pasado, foi especial. “Sempre seguiredes estando aquí connosco, porque a pegada que deixastes sempre permanecerá nos nosos corazóns”, concluía Gelines.  O monumento cos nomes dos cativos así o demostra.

 

Asistentes ao acto diante da igrexa.

 

Unha veciña sinala o momunento a carón da igrexa.

 

Entre os asistente había representantes de varios concellos da comarca.

Fotos: Carlos G. Hervella.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR