Os vindeiros días 11 e 12 de agosto celebrarase a XX Feira da Rosca de Sober, na que participarán 4 rosqueiros e rosqueiras da localidade e instalaranse 14 postos a maiores, de artesanía e gastronomía. En concreto, dous oleiros, un posto de mel, tres panaderías, catro artesáns, tres queixerías e un posto de castañas do Caurel.
Tal como adiantan dende o Concello de Sober, organizador do evento (en colaboración con Queserías Prado, Artesanía de Galicia, a Deputación de Lugo e a Xunta de Galicia), o programa arrancará o martes 11 de agosto ás 21 horas coa apertura dos stands, situados na Praza do Concello. Ás 22 horas actuará Cé Orquestra Pantasma, e de seguido haberá unha degustación gratuíta de rosca con licor café.
A feira seguirá o día grande, o mércores 12 de agosto a partires das 10 horas co disparo de 20 bombas de palenque e ás 10:15 horas o recinto feiral abrirá as portas coa actuación do grupo de música tradicional Érvedo. Ás 12 horas actuará o grupo de baile e música tradicional Pesdelán, e xa a partires das 13 horas farase a degustación de balde de 2.000 racións de rosca con queixo, cunha nova actuación do grupo Érvedo.
Na presentación da feira, o alcalde de Sober, Luis Fernández Guitián, fixo extensivo o convite a veciños, xente da Comarca, así como visitantes, a participar “nun dos eventos con maior tradición da Ribeira Sacra a través do que podemos enxalzar os produtos da zona e a nosa rosca mantendo vivo o traballo de tantos e tantos rosqueiros e rosqueiras que xa non están, pero que saben que o seu legado nunca vai desaparecer”.