CulturaCulturaÚltima hora

1,5 millóns de euros para o novo Fondo de Proxectos Culturais Xacobeo 2021 da Xunta

Diríxese a proxectos de empresas, cooperativas, entidades sen ánimo de lucro e autónomos financiados con achegas de ata 10.000 e 4.000 euros, e inclúe un amplo abano de iniciativas de música, audiovisuais, artes escénicas, dinamización da lingua, patrimonio, libro e turismo cultural, entre outros

O conselleiro de Cultura e Turismo, Román Rodríguez, acompañado polo secretario xeral de Política Lingüística, Valentín García, informa sobre o Fondo de Proxectos Culturais Xacobeo 2021.

 

O novo Fondo de Proxectos Culturais Xacobeo 2021, unha das medidas da Xunta no Plan de Reactivación dos sectores cultural e turístico fronte aos efectos da crise sanitaria provocada pola Covid-19, é unha iniciativa que busca “preservar a actividade e o emprego e xerar contidos de calidade a disposición de todos os galegos”.

Nun encontro virtual no que estivo acompañado polos membros do seu equipo (entre eles a comisaria do Xacobeo 2021 Cecilia Pereira), o conselleiro de Cultura e Turismo, Román Rodríguez, subliñou a necesidade de “inxectar liquidez inmediata” nas industrias culturais galegas a través da creación deste fondo que “amosará o talento dos profesionais e creadores nun momento de incerteza” pola crise sanitaria. Así, preténdese “reforzar as estruturas da industria cultural e estimular a demanda” nun momento no que se visibilizou a importancia e xenerosidade da cultura á hora de superar etapas socialmente difíciles como foi o confinamento.

Román Rodríguez destacou que o principal obxectivo deste fondo “é dar a posibilidade a profesionais e empresas galegos de traballar e producir os seus proxectos en condicións especiais sen ter que deixalos aparcados” e, á vez, facilitar o acceso á cultura a toda a cidadanía con fin de que poidan gozar das distintas expresións tanto en liña como de xeito presencial.

A convocatoria, dotada inicialmente cunha partida de 1,5 millóns de euros, abrirá o luns o seu prazo de presentación de proxectos. Toda a información estará dispoñible a través do web culturaeturismo.xunta.gal. O período de presentación de proxectos remata o 31 de xullo, aínda que as iniciativas presentadas poderán desenvolverse ata finais de ano. Poderán acceder a esta convocatoria todas as ramas do sector cultural con proxectos virtuais ou que se vaian realizar de xeito presencial baixo as condicións que a situación sanitaria permita. Ou mesmo combinar ambas opcións. Tamén outros servizos como deseño, produción técnica ou subministro de materiais e expresións artísticas.

 

O conselleiro de Cultura e Turismo, Román Rodríguez.

 

As disciplinas do Fondo para Proxectos Culturais Xacobeo 2021 incluirán a lingua, as artes escénicas, teatro, danza, música, artes plásticas, literatura, divulgación, patrimonio ou o turismo cultural, entre outros. Os profesionais que formen parte contarán con apoio e visibilidade para que os seus proxectos sigan a ter proxección social.

As iniciativas optarán a un investimento máximo de 10.000€ no caso de tratarse de empresas, cooperativas e entidades sen ánimo de lucro que xeren emprego, ou de 4.000 euros se se trata de profesionais autónomos. En calquera caso, esta contía pode supoñer o financiamento do 100% do proxecto. As iniciativas poderán ser compatibles coas axudas doutras entidades ou mesmo da Xunta de Galicia, pero non coas da Consellería de Cultura e Turismo para o mesmo proxecto, co fin de poder chegar ao maior número de beneficiarios posibles. Cada empresa ou profesional poderá presentar un proxecto, no que deberán apostar pola lingua galega, se ben poderán promover igualmente o plurilingüismo sempre que se inclúa unha versión en galego ou habiliten mecanismos de subtitulado.

Na primeira das tres modalidades do Fondo Xacobeo 2021 incluiranse os proxectos musicais, audiovisuais e de artes escénicas. Na segunda terán cabida os proxectos para dinamizar a lingua galega, o patrimonio cultural e os proxectos editoriais, literarios e expositivos. A última das modalidades está dirixida ao ámbito xacobeo, turístico, xeográfico, paisaxístico, gastronómico e de usos e costumes sociais.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close