. En total, corenta e oito alumnos e alumnas de cinco centros educativos da comarca de Verín foron os finalistas no Certame de Poesía Xosé Carlos Caneiro Pérez e no Certame de Relato Curto Antonio Fernández Pérez, iniciativas que promove o Concello de Verín con motivo do Día das Letras Galegas. Os certames contaron, un ano máis, coa colaboración de Gadis.
Dende o Concello de Verín, debido á actual situación sanitaria e as dificultades para organizar unha gala que habitualmente concentra a centos de pais e nais, optouse este ano por dixitalizar o formato dos certames cunha “Lectura nas redes” na que os gañadores de cada categoría puideron mostrar as súas obras a través da web e Redes Sociais oficiais do Concello de Verín. Segundo reflicten os datos oficiais, un total de 5.300 persoas visualizaron as lecturas dos relatos curtos e poesías gañadoras desde a súa publicación – o propio Día das Letras Galegas- ata hoxe.
Os centros participantes este ano no Certame de Relato Curto Antonio Fernández Pérez e no Certame de Poesía Xosé Carlos Caneiro Pérez foron o CEIP Amaro Refojo o Colexio Plurilingüe María Inmaculada, o IES Castro de Baronceli, o IES Xesús Taboada Chivite e o Colexio Apostólico Mercedario.
Á fase final dos certames chegaron un total de 48 persoas. No Certame de Relato Curto Antonio Fernández Pérez pasaron un total de 24 narracións, 6 en Primaria, 9 en 1º e 2º de ESO, e 9 en 3º e 4º de ESO. Finalistas do Certame de Poesía Xosé Carlos Caneiro foron 24 os poemas finalistas, 6 de Primaria, 9 de 1º e 2º de ESO, e 9 en 3º e 4º de ESO.
Os premios aos gañadores consistiron en 90 euros, lote de libros e diploma, e corresponderon no Certame de Relato Curto Antonio Fernández Pérez ás narracións O encanto da lagoa Ploof de María García Airabella, alumna de 6º de Primaria do CEIP Amaro Refojo; Un abrir e pechar de ollos de Sara Pérez González, alumna de 2º de ESO; e Sintoo, meu amor de Ágatha Borrul Prieto, alumna de 4º, as dúas do Colexio María Inmaculada. No Certame de Poesía Xosé Carlos Caneiro Pérez, os poemas vencedores foron A fada dos versos de Catalina González Álvarez , alumna de 6º de Primaria, Aloumiñarte a ti de Zoe Oliveros Fernández, alumna de 1º de ESO e Compañeiro eterno de Rodrigo González Álvarez, alumno de 3º de ESO, os/as tres do Colexio María Inmaculada.
Os segundos e terceiros premios en cada unha das seis modalidades dotados con 60 e 30 €, lotes de libros e diploma, repartíronse entre alumnos do IES Castro de Baronceli, 1 segundos e 2 terceiros; Colexio María Inmaculada, 2 segundos e 2 terceiro, CEIP Amaro Refojo, 2 segundos e 2 terceiros; e Colexio Apostólico Mercedario, 1 segundo e 1 terceiro.
