O Carballiño estase xa preparando para a gran cita do ano: a Festa do Pulpo que este ano chega á 56 edición cuha amplo abano de actividades previstas para a primeira quincena no mes de agosto.
Para ir quentando motores, na mañça do 16 de xullo tiña lugar a presentación no salón de plenos do Concello coa asistencia do alcalde Francisco Fumega; a delegada territorial da Xunta, Mª Sol Díaz; o vicepresidente da Deputación, Rosendo Fernández; o xerente do Inorde, José Manuel Rodríguez; o director de zona de Abanca, Carlos Díez; os concelleiros de Cultura e Turismo, Diego Fernández e José Manuel Dacal, respectivamente, así como os portavoces, concelleiras e concelleiros da corporación, e representantes das entidades patrocinadoras da festa.
O día central da celebración será o domingo 12 de agosto co multitudinario xantar no parque municipal, e ese día intentarase repetir o fito de afluenza e consumo de polbo do pasado ano, malia que este ano o Concello márcase o reto de mellorar a calidade dos servizos, xa que “non é moi doado que se superen as últimas cifras de preto de 100.000 persoas e arredor de 70.000 kg de polbo”, asegurou o alcalde na presentación, facendo referencia á dedicatoria desta edición da festa ao Centro do Carballiño en Bos Aires como “un xesto de agradecemento cara os emigrantes da comarca carballiñesa na capital da Arxentina”, dixo, agradecendo asemade a colaboración das institucións.
Marisol Díaz pola súa parte, asegurou que “a Xunta de Galicia cre nas festas galegas como un xeito de achegar os recursos naturais, culturais e gastronómicos ao turismo, e por iso forma parte da súa estratexia a promoción dos eventos enograstronómicos como o da Festa do Pulpo do Carballiño”. Nese senso, destacou “a tradición dos oficios artesanais das polbeiras e polbeiros como un referente da gastronomía galega” ao tempo que aposta polo turismo de calidade. “O Carballiño soubo traer ao interior a esencia do mar, e por iso o mellor polbo do mundo elabórano as pulpeiras e pulpeiros do Carballiño”, dixo o vicepresidente da Deputación, Rosendo Fernández, que se referiu a esta festa como “a maior manifestación gastronómica popular de Galicia”.
Os concelleiros Diego Fernández e José Manuel Dacal foron os encargados de desglosar unha parte do programa cultural e festivo elaborado para a primeira quincena de agosto, que consta de máis dunha vintena de actividades e de trinta grupos de animación, música, folclore e outro tipo de eventos. “A 56 Festa do Pulpo terá lugar o domingo 12 de agosto, pero o martes día 8 tamén se celebrará a Tapa do pulpo máis grande do mundo, cuxo reto nesta edición será rebaixar dos 10 minutos o tempo de cortar o polbo para encher o prato xigante”, segundo explicou Manuel Dacal.
A primeira semana estará adicada aos máis pequenos, con obradoiros, xogos, festa da escuma e maxia, e a partires de aí sucederanse as actividades para o público adulto: ruta das tapas, música de rúa, Festival de Habaneras, deporte, xornadas de folclore, a festa das camisetas das peñas, baile, así como o “gran concerto da Festa do Pulpo” con Mikel Erentxun, entre outras.
Máis información na vindeira edición en papel do Periódico O Sil.
Fotos: Carlos G. Hervella.
